23 ka mga Norwegian senior citizens, patay matapos ginbakunahan sang Pfizer-BioNTech vaccine

Patay ang 23 ka mga Norwegian senior citizens nga ginbakunahan sang Pfizer-BioNTech vaccine batuk sa COVID-19.

Suno kay Norwegian Medicines Agency Chief Physician Sigurd Hortemo, ang side effects sang bakuna kaangay sang hilanat kag nausea ang mahimo makapalala sang kondisyon sang mga mahina nga pasyente.

Base naman sa Norwegian Institute of Public Health, tuman ka delikado ang COVID-19 vaccines sa mga katigulangan kag may mga ginabatyag ukon may balatian.

Nagapakig-angot na ang Pfizer BioNTech sa Norwegian regulator agud imbestigahan ang kamatayon sang 23 ka mga tigulang.

Nahibaluan nga nakahatag na sang first dose ang Norway sa ginabanta 33,000 ka tawo .

Sa pihak nga bahin, sa Estados Unidos, 21 ka mga kaso sang severe allergic reactions ang narekord humalin sang Disyembre 14 tubtob Disyembre 23 matapos mahatag ang 1.9 million initial doses sang bakuna nga gindevelop sang Pfizer.