Nagalalain ang Land Transportation Franchising and Regulatory Board (LTFRB) Region VI matapos nakabaton sang pagpakamalaot bangud sa pagsalangisag sang mga drivers agud nga magkuha sang ayuda ukon Social Amelioration Program (SAP).
Sa exclusive interview sang Bombo Radyo Iloilo kay LTFRB Region 6 Director Richard Sayco Osmeña, iya ginpahayag nga ang katungdanan lamang sang ila opisina amo ang pagbulig sa Department of Social Welfare and Development (DSWD) sa paghatag sang mga pangalan nga qualified sang SAP.
Suno kay Osmeña, kun may pamangkot ukon reklamo ang mga drivers sa SAP, nagakadapat ang mga ini nga magpadulong sa opisina sang DSWD.
“I don’t know why everbody is pushing and looking at the fault of LTFRB. But the one that is in charge of this distribution is not LTFRB, it is DSWD. So sila ang in charge da sang tanan. Kami ya, we just provided the names of the qualified drivers tapos ang distribution, DSWD gid,” pahayag ni Osmeña.
Nahibaluan nga bangud sa kakulang sang information dissemination, nagtuga sang madamo nga huol sa mga drivers sa Western Visayas ang malaba nga pagpila sa LTFRB agud nga makakuha sang SAP.
Matandaan nga ang nasambit nga ayuda ang ginpatigayon sang DSWD kag Department of Transportation (DOTr) agud mabuligan ang mga drivers nga apektado ang kinitaan bangud sa COVID-19 pandemic.
