ILOILO CITY – Nagpareserba ang Iloilo City Government sa British-Swedish multinational pharmaceutical kag biopharmaceutical company nga AstraZeneca agud magbakal sang dugang nga 200,000 doses sang COVID-19 vaccine.
Sa interview sang Bombo Radyo kay Mayor Jerry Treñas, iya ginpahayag nga ang dugang nga baklon sang gobyerno ang para sa 100, 000 nga empleyado nga nagatrabaho sa Iloilo City apang indi residente sang syudad.
Suno kay Treñas, luyag sang gobyerno nga may yara sang bakuna nga nagakaigo para sa tanan mangin residente man sang syudad sang Iloilo ukon indi.
Gin-athag man sang alkalde nga wala sa gihapon sang pilitay ang pagpabakuna sa COVID-19.
Apang sa pihak sini, gintuad man ni Treñas nga maabot ang tinion nga mangin required na ang pagpabakuna ilabi na sa pagbyahe sakay sang eroplano ukon iban pa gid nga sahi sang transportasyon.
Pahayag sang alkalde, may yara na sang vaccine passport sa iban nga pungsod sa diin kinahanglan nga makapabakuna anay sa COVID-19 antes makabyahe.
Dugang pa sang natungdan, posible nga sa indi madugay nga panahon, i-mando man sa Pilipinas ang pag-angkon sang vaccine passport ilabi na nga padayon ang pagsaka sang COVID-19 cases.
