ILOILO CITY – Naghingyo sang prankisa ang isa ka grupo sang manugbulang sa Iloilo City Council agud mag-operate sang online bulang sa syudad sang Iloilo.
Ang nasambit nga grupo amo ang United Association of Cockpit Owners and Operators of the Philippines, Inc. (UACOOP) nagikan sa Mandaluyong, City kag ginapamunuan ni Eric dela Rosa.
Sa interview sang Bombo Radyo kay Iloilo City Councilor Atty. Romel Duron, iya ginpahayag nga ang hingyo sang nasambit nga grupo amo ang pagpahanugot nga makapatigayon sila sang live broadcast sang bulang sa mga establisyemento komersyal sa diin may yara sang pagpustahanay.
Suno kay Duron, magahiwat anay sang committee hearing ang Sangguniang Panlungsod bag-o magpaggwa sang desisyon angot diri.
Kun mahimo nga mapahanugutan, nagakinahanglan nga magsunod ang UA COOP sa health protocols kag guidelines sang Inter-Agency Task Force on Emerging Infectious Diseases (IATF).
