ILOILO – Nagdangat sa pito sa siyam ka mga napatay matapos ginapahayag nagbato sa mga otoridad sang ginserbihan sang search warrant sa Brgy. Roosevelt kag Lahug Tapaz, Capiz kag sa Calinog, Iloilo ang nagnegatibo sa paraffin testing.
Sa exclusive interview sang Bombo Radyo Iloilo kay Pol. Col. Enrique Ancheta, pinuno sang Police Regional Office (PRO) 6 Crime Laboratory, iya ginpahayag nga gilayon nga ginpaidalum sa paraffin testing ang bangkay sang mga biktima agud makumpirma kun may presensya sang gun powder residue ang mga kamot sini.
Gin-athag ni Ancheta nga ang resulta sang paraffin testing amo ang indi conclusive bangud madamo sang posibilidad nga makaapekto sa palibot sang mga biktima kaangay na lamang sang hangin.
Apang ang paraffin testing suno sa natungdan ang makabulig dugang sa imbestigasyon.
Nagpamalibad naman ang natungdan nga ituad ang mga pangalan sang mga biktima nga nagpositibo sa paraffin testing.
Sa subong, ginahulat pa ang resulta sang ballistic examination sa mga narekober nga indi lisensyado nga mga matag-as nga kalibre sang armas kag granada.
Nahibaluan nga nangin kontrobersyal ang operasyon nga resulta sang gintingob nga pwersa sang Philippine Army kag Philippine National Police kung sa diin ini ang ginpangunahan sang Criminal Investigation and Detection Group National Office.
