ILOILO – Dako nga pagpanghangkat para sa Iloilo Provincial Police Office (IPPO) ang paghibalo sa matuod nga motibo sa likod sa pagpangluthang sa duha ka empleyado sang Department of Public Works and Highways (DPWH) 4th District Engineering Office sa Brgy. Bolong Oeste Sta. Barbara, Iloilo.
Matandaan nga maswerte nga nakaluwas sa insidente sanday Engr. Eva Bedonia, pinuno sang Quality and Assurance Section sang 4th Engineering District sang DPWH kag driver nga si Rogelio Serilo Jr.
Pakadto na kuntani ang duha sa opisina sang ginpaarakan-luthang ang ila service vehicle.
Una na nga ginpahayag nga posible si Engr. Bedonia ang target sang riding-in-tandem suspects bangud may lima ka igu sang bala sa passenger side sang pick-up kun sa diin ini nagapungko.
Sa interview sang Bombo Radyo kay IPPO Director Police Colonel Gilbert Gorero, iya ginpahayag nga isa sa dako nga pagpanghangkat agud matul-id ang identity sang mga suspek, amo ang kakulang sang mga direct witness.
Suno kay Gorero isa sa ginalantaw rason sang pagpangluthang, amo ang may kaangtanan sa daan na nga hiligut-anon bangud sa away sa duta sa pamilya ni Bedonia.
Apang suno kay Gorero, dako man ang posibilidad nga may yara sang away sa trabaho si Bedonia.
Ini bangud kaangay nga bantay sarado ang hulag niya sa diin gina-alegar target gid ini nga patyon.
Dugang pa sang natungdan, nangin doble man ang paghalong ni Bedonia bangud sa kahangawa nga dala sang insidente.
Nahibaluan nga gindala na sa crime laboratory sa Police Regional Office 6 ang mga bala nga nasapwan sa crime scene agud mapaidalum sa ballistic examination.
