ILOILO CITY – All set na ang patigayunon nga Dinagyang Motorcade sa Enero 22, umpisa las 2:00 sang hapon.
Sa interview sang Bombo Radyo kay Mr. Robert Alor, coordinator sang Sto. Niño Religious Motorcade, iya ginpahayag nga ang motorcade ang patigayunon sa baylo sang fluvial parade nga ginahiwat kada tuig.
Suno kay Alor, dal-on kag ilibot ang imahe ni Senior Sto. Niño sa pito ka mga distrito sa syudad sang Iloilo.
Ini amo ang Iloilo City Proper, La Paz, Iloilo City, Jaro, Iloilo City, Mandurriao, Iloilo City, Molo, Iloilo City, Villa Arevalo, Iloilo City kag
Lapuz, Iloilo City.
Masobra suno kay Alor sa 20 ka imahe ni Senior Sto. Niño nga may lakip nga mga disenyo ang ipasundayag sa bilog nga syudad sang Iloilo.
Magalibot man ang mga imahe ni Sto. Niño sa pito ka mga simbahan sang syudad.
Ini amo ang San Jose Parish Church, Bo. Obrero Church, LaPaz Church, Jaro Cathedral, Mandurriao Church, Arevalo Church kag Molo Church.
Gin-athag ni Alor nga ini ang tuman ka importante agud mangin kabahin ang tanan nga simbahan sa syudad bilang paghatag sang kadungganan kay Senior Sto. Niño.
Magabagting man suno sa natungdan ang lingganay sang mga simbahan samtang nagalabay ang mga imahe ni Sto. Niño.
Nagpangabay man si Alor sa mga deboto nga maghulat na lamang sa higad sang dalan samtang dala ang imahe sang ila nga mga santos kag mag-obserba sang physical distancing.
Sundon suno sa iya ang tanan nga mga minimum health protocols sa patigayunon nga motorcade.
Samtang, ginpahayag sang Presidente sang Iloilo Festivals Foundation Inc. (IFFI) nga ang imahe ni Senior Sto. Niño ang nagapakita sang pagpalangga kag debosyon sang mga Ilonggo.
Sa interview sang Bombo Radyo kay Atty. Jobert Peñaflorida, iya ginpahayag nga ang Dinagyang Festival subong nga tuig ang may tema nga “One Dinagyang, One Iloilo, Halad kay Senior Sto Niño”.
Ini ang rason suno sa natungdan nga apisar sang pagpanghangkat nga dala sang COVID-19 pandemic, padayon nga nagahatag sang nagakaigo nga debosyon ang mga Ilonggo kay Senior Sto Niño.
Suno kay Peñaflorida, liwat man nga ginpahamtang ang may 40 ka tapak nga kataason nga Sto. Niño sa Calle Real sa syudad sang Iloilo sa diin nagahatag man sang kasanag kun kagab-ihon.
Matandaan nga ang Dinagyang Digital 2021 ang bug-os nga ginasuportahan sang Iloilo City Government, Parish of San Jose de Placer, kag sang Department of Tourism (DOT).
