ILOILO CITY- Gin-reshuffle na ang mga district engineers sa bilog nga pungsod bilang kabahin sang kampanya batok sa korapsyon sa ahensya.
Sa interview sang Bombo Radyo kay Engr. Rodney Gustilo, iya ginpahayag nga kabahin siya sa una nga batch sang district engineers nga ginsaylo sa lain nga assignment.
Suno kay Gustilo, sila ang magabayluhanay sang posisyon ni Engr. Heide Alonan sang 3rd Engineering District sa Kabankalan, Negros Occidental.
Pahayag niya,magaumpisa ang iya bag-o nga assignment epektibo sa masunod nga semana.
Dugang pa sang natungdan, sa 183 nga mga district engineers sa bilog nga pungsod, 61 ang nalakip sa una nga batch sa diin kalabanan sa ila ang naglapaw na sa maximum nga lima ka tuig nga assigment sa isa ka distrito sa diin si Gustilo ang kapin siyam ka tuig na nagserbi nga city engineer sa Iloilo City District Engineering Office.
Matandaan nga 14 ka mga district engineers sa bilog nga pungsod ang gindismiss sa ila posisyon bangod sa ginaalegar kahilabtanan sa korapsyon.
