ILOILO – Ginahanda na sang mga otoridad ang kaso nga ipasaka batok sa mga suspek nga nagpatay sa isa ka menor de edad nga lalaki sa Pagsanga-an Pavia, Iloilo.
Ang biktima amo si Dominic Gumban, 17, residente sang Brgy. Cabugao Norte, Sta. Barbara, Iloilo kag nagatrabaho sa babuyan sang iya tiya sa nasambit nga lugar.
Ang mga suspek naman amo sanday Romeo Celis, 43, kag Rodniel John dela Cruz, 18, lunsay residente sang Brgy. Tacas, Jaro, Iloilo City.
Sa exclusive interview sang Bombo Radyo kay Pol. Major Jojo Tabaloc, hepe sang Pavia Municipal Police Station, iya ginpahayag nga nag-inom ang biktima kagab-i upod ang mga suspek.Suno kay Tabaloc, nagbais ang biktima kag ang mga suspek.
Diri kag ginpulihan sang mga suspek sang buno ang biktima nga amo ang iya gintunaan sang iya kamatayon.
Si dela Cruz ang nagbuno sang duha ka beses sa tiyan ni Gumban kag nagpuli man buno sa liog si Celis.
Gintuyo pa kuntani nga taguon sa mga suspek ang mga habol nga may dugo sa sulod sang babuyan.
Samtang ang kutsilyo naman nga ginapanag-iyahan sang biktima apang gingamit sa pagbuno sa iya sang mga suspek ang narekober man sa crime scene.
Ginpaggwa pa suno sa pulis sang mga suspek nga may kaupod si Gumban paggwa sa babuyan agud matago ang kamatuoran nga sila ang nagpatay sa biktima.
Apang bangud sa mga ebidensya nga nakuha sa mga suspek kag ang ila pag-ako sa krimen ang nagserbe sa pamatuod nga sila ang nagpatay sa biktima.
