ILOILO CITY – Dako ang pasalamat sang La Paz Police Station matapos lunsay nga nagnegatibo sa reverse transcription polymerase chain reaction (RT-PCR) test ang kapin 80 ka mga police personnel.
Ini matapos nagpositibo sa COVID-19 ang tatlo ka mga pulis kag tatlo ka preso. Sa interview sang Bombo Radyo kay PMAJ. Edfil Balibadlan, hepe sang La Paz Police Station, iya ginpahayag nga gilayon sila nga nagpaidalum sa RT-PCR test agud matumod kun bala nalatnan sila sa COVID-19.
Suno kay Balibadlan, naggwa nga lunsay sila tanan nagnegatibo kag sa subong, ginatapos nalang ang ila 14 day quarantine sa ila tagsa ka balay.
Nag-augment naman sa La Paz Police Station ang mga pulis nagikan sa nagkalain-lain nga police station sa syudad sang Iloilo.
Samtang, naghatag naman sang pahanugot ang COVID-19 Team sang Iloilo City Government sa pagbalik sa trabaho sang mga personnel sang La Paz Police Station.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga bangud lunsay naman negatibo ang resulta sang RT-PCR test sang 76 ka mga personnel sang La Paz PNP, mahimo na ang mga ini nga makabalik sa trabaho.
Suno kay Conlu, napaidalum naman sa disenfection ang La Paz Police Station agud indi na maglapata ang virus sa lugar.
