ILOILO CITY – Indi na kinahanglan nga magpaidalum sa reverse transcription polymerase chain reaction (RT-PCR) test sa place of origin ang magapauli nga residente sa syudad sang Iloilo.
Sa exclusive interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga ang mga magapauli nga Locally stranded individuals (LSI), returning overseas Filipino (ROF) kag Authorized Persons Outside Residence (APOR) ang magapaidalum sa swab test sa Iloilo.
Suno kay Conlu, ang mga nagsakay sa eroplano ang ipaidalum sa RT-PCR test pag-abot sang mga ini sa airport.
Samtang ang nagasakay naman sa barko ang dal-on sa Jubilee Hall agud i-swab test.
Antes makapauli, kinahanglan nga magpirma sang affidavit of undertaking kag ini ang ipasa sa Iloilo City COVID-19 Emergency Operation Center pinaagi sa messenger ukon email.
Magluwas sini, kinahanglan man sa gihapon ang notice of coordination ukon acceptance, kag medical certificate antes pasugtan nga makapauli sa Iloilo.
