WASHINGTON D.C – Nagsumpa na ang Democrat nga si Joe Biden bilang Presidente sang Estados Unidos.
Ang bibliya nga ginatungtungan sang iya nawala nga kamot ang ginapanag-iyahan sang iya nga pamilya humalin pa sang 1893.
Ini man ang gingamit niya sang siya ang nagsumpa bilang bise presidente sang 2009 kag 2013 kag bilang senador sa Delaware.
Ang bibliya ang may yara sang 5 inches nga kadamulon.
Si Biden, 78 anyos amo ang pinakatigulang Presidente sang Estados Unidos kag siya man ang ika-duha nga Roman Catholic President kasunod kay John F. Kennedy.
Yari pamatian ang pagsumpa ni US President Joe Biden sa pagpanguna ni U.S. Chief Justice John Roberts .
Magluwas kay Biden, nagsumpa man si Kamala Harris bilang labing una nga babaye nga bise presidente sa kasaysayan sang Estados Unidos.
Una na nga ginpahayag ni Harris nga apisar siya ang una nga babaye sa nasambit nga posisyon, iya ginasiguro nga indi ini mangin katapusan bangud nagapati siya nga ang America ang pungsod sang madamo nga posibilidad.
Sa una nga mensahe nga ginhatag ni Biden sa iya pagpungko bilang Presidente, iya ginpasalamatan ang mga nagtambong sa inagurasyon gikan sa nagkalain-lain nga partido — sa Democratic party man ukon Republican Party sa diin yara sanday former US Presidents Bill Clinton, George Bush kag Barack Obama nga nagtambong sa seremonya.
Ginakabig niya nga adlaw sang Amerika kag adlaw sang demokrasya ang inagurasyon nga natabo.
Nagpasalig man si Biden nga iya amat-amat nga papason ang mga pagpangahangkat nga ginapangatubang sang Estados Unidos — lakip na ang pandemya.
Apang nagpangabay ini sa publiko nga mag-isa kag magkooperar ang tanan agud nga mabalik ang America nga malinong.
Nagpangabay man si Biden sa mga rioters nga untatan na ang kinagamo bangud kun wala sang kooperasyon, indi gid malab-ot ang kalinongan nga ginahandom sang Estados Unidos.
