Kinahanglan nga magkuha ang pamilya ukon ang isa ka manunubli sang Affidavit of Self Adjudication oras nga magtaliwan ang tag-iya sang duta ukon balay kag wala sang last will and testament nga ginbilin.
Sa interview sang Bombo Radyo kay Judge Ma. Dianela Olmedo Ladrido, Presiding Judge sang Barotac Nuevo Municipal Trial Court, iya ginpahayag nga ang Affidavit of Self Adjudication amo ang kasulatan sang mga labing manunubli ukon immediate family sa diin nagapahayag nga sila ang mangin tag-iya sang kabug-usan nga duta.
Suno kay Ladrido, tuman ini ka importante nga mahibaluan sang publiko bangud masami ini nga ginatunaan sang kinagamo sang magpamilya ilabi na kun magtaliwan ang ginikanan kag wala sang kasulatan nga ginbilin kun kay sin-o magakadto ang ginapanag-iyahan nga properties ukon duta.
Bangud diri, ginpaathag sang hukom nga dako ang mabulig sang pagkuha sang nasambit nga affidavit sa diin mas madali ini kag mas barato nga pamaagi sa pag-angkon sang palanublion.
Pahayag niya, kinahanglan lamang ipasa ang affidavit sa Office of the Register of Deeds sa lugar kun diin nag-istar ang minatay.
Dugang pa ni Ladrido, kun mag-obra sang Affidavit of Self-Adjudication, lakip sa mga kinahanglanon nga impormasyon amo ang mga masunod:
- Pangalan kag mga detalye sang isa ka manunubli (nationality, address, relationship to the deceased)
- Pangalan kag Petsa sang Pagkamatay sang himata kag
- Paglaragway sang properties nga ginapanag-iyahan sang himata nga igapanubli
