ILOILO – Nagapadayon ang imbestigasyon sang Iloilo Police Provincial Office (IPPO) sa natabo nga pagbunggo-patay sang hepe sang Balasan Police Station nga si Police Major Samuel Vipinosa sa dalan sang Barangay Central Ajuy, Iloilo.
Ang biktima amo si Juan Astaquinta, 70, kag ginapahayag may deperensya sa panghuna-huna.
Sa interview sang Bombo Radyo kay Iloilo Police Provincial Office (IPPO) Dir. Pol. Col. Gilbert Gorero, iya ginpahayag nga yara na sa kustodiya sang Ajuy Municipal Police station si Vipinosa.
Suno kay Gorero, nakadepende sa pamilya ni Astaquinta kun magapasaka sila sang kaso batok kay Vipinosa.
Gin-athag man ni Gorero nga bisan isa ka uniformed personnel si Vipinosa, nasaad sa layi nga nagakadapat pasakaan sang kaso ang bisan sin-o man nga makahimo sang sala.
Sa subong suno sa natungdan, may yara pa sang ongoing dialogue ukon istoryahanay sa pamilya ni Astaquinta kag Vipinosa.
