ILOILO CITY – Nangin madinuagon kag masadya ang selebrasyon sang Digital Dinagyang 2021 nga may tema nga ‘One Dinagyang, One Iloilo, Halad kay Señor Sto. Niño.
Sa interview sang Bombo Radyo kay Atty. Jobert Peñaflorida, Presidente sang Iloilo Festivals Foundation Inc., iya ginpahayag nga nangin madinalag-on ang selebrasyon sang mga aktibidad nga kabahin sang Digital Dinagyang 2021.
Suno kay Atty. Peñaflorida, tuman ang iya pagpasalamat sa mga nagsuporta sa isa ka pinasahi nga selebrasyon sang Dinagyang.
Gin-ako man ni Peñaflorida nga tuman kabudlay ang pagpanghangkat nga ila naagyan agud madayon ang Digital Dinagyang 2021 ilabi na subong nga may pandemya.
Apang bangud sa pagbuligay sang tanan, napun-an sang kalipay ang kahitawan sa diin wala ginkompromiso ang ikaayong lawas sang mga performers.
Lakip sa mga tribu nga nagpasundayag amo ang :
- Tribu La Paz sa diin ang choreographer amo si Errol Jave Villalobos
- Tribu Jaro sa diin ang choreographer amo si John Paul Patrimonio
- Tribu Villa, Arevalo sa diin ang choreographer amo si Brian Francisco
- Tribu Molo sa diin ang choreographer amo si Georege Susvilla
- Tribu Lapuz sa diin ang choreographer amo si Gerlin Francisco
- Tribu Mandurriao sa diin ang choreographer amo si Johnrey Collado
- Tribu City Proper sa diin ang choreographer amo si Rey Vincent Jaena
Samtang, ginpasidunggan naman ang mga tribu pinaagi sa Virtual Awarding Ceremony.
Lakip sa mga ginpasidunggan amo ang mga masunod:
People’s Choice Award- Tribu Paghidaet sang La Paz District
Best in Performance- Tribu Salognon sang Jaro District
Best in Costume and Production Design kag Best in Choreography- Tribu Ilonganon sang Lapuz District
Best in Music- Tribu Panayanon sang Molo District
Sa Pinta sa Kapistahan:
People’s Choice Award – TEAM MERAKI
Champion- TEAM PALLADIUM
1st Runner-Up- TEAM TINTA
2nd Runner-Up-TEAM KUDIT
Sa Landmark Competition:
1st place- Architect Adonis Canonicato
2nd place- Mel John Corral
3rd place- Architect Lorenzo de Felipe Jr.
Sa Dinagyang sa Calle Real Time Competition:
PATISOY NI NONOY- Jhuvael Echona sang La Paz, Iloilo City
KI-AY KI-AY SANG LIN-AY- Maraya Veronica Alcoran sang La Paz, Iloilo City
MERRYMAKING IT REAL TIME DANCE COMPETITION- Crep Nusty Crew sang La Paz, Iloilo City
Sa Dinagyang Drumbeats Contest:
Champion – Tukar Ilonggo sang Arevalo District
1st Runner-Up – Ilonggo Patik sang Jaro District
2nd Runner-Up – RCP Prakatakeras sang City Proper
Ginpabugal naman ni Iloilo City Mayor Jerry Treñas ang ginpatigayon nga Digital Dinagyang 2021.
Suno kay Mayor Treñas, ang Dinagyang Festival ang nagapamatuod lang sa pagka-resilience sang mga Ilonggo sa pihak sang COVID-19 pandemic.
Ginpahayag ni Treñas nga labi nga talalupangdon ang kapisan kag pag-isa sang tanan para sa mga programa sang syudad.
Tuman man ang pasalamat niya sa pribado nga sektor nga padayon nga nagasuporta sa Iloilo City Government kag sa Iloilo Festivals Foundation Incorporated.
Sa pagtakop sang Dinagyang Digital 2021, gintuad sang alkalde nga ‘extremely proud’ siya sa worldclass celebration sang syudad sang Iloilo bangud wala napunggan ang debosyon sang mga Ilonggo kay Senior Sto. Niño apisar sang mga pagpanghangkat nga dala sang COVID-19.
