ILOILO CITY – Gin-ako sang Iloilo City Government nga may yara sila sang kapaltahan matapos wala nasunod ang health protocol sa awarding sang Digital Dinagyang 2021.
Sa exclusive interview sang Bombo Radyo kay Fernando Jose ‘Boyet’ Rico, pinuno sang compliance team sang Iloilo City Government, iya ginpahayag nga madamo sang mga tawo nga nagdugok sa kahiwatan matapos nagpalapta nga may yara sang fireworks display matapos ang awarding.
Suno kay Rico, mangin ang mga pulis ang wala nakasarang sa pagkontrol sa pagdugok sang tawo sa diin wala na napatuman ang physical distancing.
Ginpahayag man sang natungdan nga may ginticketan sila nga 22 ka mga persona sang Enero 23 kag siyam sang Enero 24.
Apang ginakonsiderar ni Rico nga bawion nalang ini matapos nga tuman kadamo ang mga naglapas sa health protocol sa Iloilo Business Park nga amo ang venue sang awarding ceremony sang Digital Dinagyang 2021.
Ini nga lihok ang ikonsulta naman sang natungdan kay Iloilo City Mayor Jerry Treñas para sa pinal nga desisyon.
