Ginasunod lang sang Iloilo Provincial Government ang mga nasaad sa mga Administrative, Executive kag Circular Order nga ginapapanaog sang national government.
Ini ang ginpahayag ni Dr. Cynthia Cabangay Ng, pinuno sang Hospital Management Office kasunod sang reklamo sang mga contract of services sa mga district hospitals sa probinsya sang Iloilo nga ginapahayag wala makabaton sang allowance ukon incentives sa idalom sang Administrative Orders 35 tubtob 38 nga ginpirmahan ni Presidente Rodrigo Duterte.
Sa interview sang Bombo Radyo kay Dr. Ng, iya ginpahayag nga sa idalom sang Administrative Order 35, makapila na ini ka beses nga ginpaathag sang Hospital Management Office pinaagi sa mga pinuno sang ospital sa probinsya.
Suno sa iya, nagpadala ang Department of Health sang Memorandum of Agreement (MOA) nga nagasiling nga ang ahensya amo ang mahatag sang kwarta sa mga kwalipikado nga mahatagan sang active hazard pay.
Apang sa idalom sang MOA nagasiling nga indi ini mangin epektibo ukon indi mahatag ang allowance kun wala sang pondo nga available ukon maglapaw na sa Disyembre 31, 2020.
Natapos lang ang Disyembre pahayag ni Ng apang wala makadownload ang DOH sang kwarta gani wala sang kuhaan ang Iloilo Provincial Government bangud ang funding source amo ang nasambit nga ahensya.
Sa Service Recognition Incentive naman sa idalom sang AO 37 nakabutang nga ang mga contract of service kag job hires ang indi sakop sa makabaton sang P10,000 apang sakop naman sila sa idalom sang AO 38 nga gratuity pay ukon makabaton sang indi magsobra sa P3,000.
