Mga naglapas sa Provincial Ordinance 2020-04 sang Guimaras, yara na sa 338; 268 diri nakabayad na sang multa

Naglab-ot na sa 338 ka mga tawo ang narekord sang Legal Office sang Guimaras nga naglapas sa Provincial Ordinance 2020-04 ukon pagsuksok sang face mask kag pag-obserba sang physical distancing sa tunga sang COVID-19 pandemic.

Sa interview sang Bombo Radyo kay Atty. Jeheil Conlu Casa, pinuno sang Legal Office-Guimaras, iya ginpahayag nga 268 sa kabug-usan nga numero ang nakabayad na sang multa kag 14 ang mga menor edad .

Gin-athag ni Casa nga wala gilayon ginadakop ang makit-an nga nagalapas sa Provincial Ordinance kundi ginahatagan sang warning.

Sa first offense, P500 ang baydan; second offense, P1,000 kag third offense, P1,500.

Kun indi ini mabaydan sa sulod sang 72 ka oras, may yara sang penalidad nga Php 5,000.00 ukon pagkapreso.

Dugang pa ni Casa, wala na ginapabayad ang mga menor de edad apang sila ang gina-refer sa Municipal welfare officers kag ginapatawag ang ila ginikanan agud nga malaygayan.