ILOILO CITY – Hugot nga ginpamalabagan ni Iloilo City Councilor Rudolph Ganzon ang prangkisa nga ginpasar sang Iloilo City Council sa United Association of Cockpit Owners and Operators of the Philippines, Incorporated sa pagpatigayon sang online nga bulang.
Sa interview sang Bombo Radyo kay Ganzon, iya ginpahayag nga kadamo sang mga bagay nga indi maathag sa iya bangud may yara sang pagsalangisag sa ginpaggwa nga pagsulundan sang Inter-Agency Taskforce kag Department of the Interior and Local Government (DILG) sa pagpatigayon sang online nga bulang.
Apisar sini, ginpahayag sang konsehal nga ginarespeto niya ang desisyon sang iban niya nga kaupdanan sa Sangguniang Panlunsod, apang luyag niya maathagan antes maghatag sang desisyon bangud posible nga mabutang sa alang-alang ang syudad sang Iloilo.
Gintuad ni Ganzon nga indi niya mahimo nga masuportahan ang prangkisa sa pagpatigayon sang online nga bulang bangud madamo siya sang nakita nga indi maathag sang gintun-an niya ang mga pagsulundan kaupod ang iya legal team.
Magluwas kay Ganzon, ginapamatukan man ni Iloilo City Councilor Frances Grace Parcon ang nasambit nga prangkisa.
Nahibaluan nga base sa Department of the Interior and Local Government memorandum circular 2020-140, ang mga lugar nga yara sa idalom sang Modified General Community Quarantine (MGCQ) ang mahimo na nga maka-operate sang bulang apang kinahanglan nga masunod ang pila ka mga kondisyon.
Lakip sa mga kondisyon amo ang pag-obserba sang health protocol; wala sang live audience, wala sang online ukon telecasting kag nakadepende sa local government unit kun pahanugutan ang pag-operate sang bulang.
Sa Resolution 79 Series of 2020 sang Inter-Agency Taskforce, indi pagpahanugutan ang personal nga presensya sang mga audience, ang online kag remote betting ukon pagpustaanay, kag ang live broadcasting ukon telecasting sang cockfights.
Sa Memorandum Circular 2020-140 naman sang Department of the Interior and Local Government, responsibilidad man sang mga local government unit officials nga imonitor ang cockfighting operations kag tutukan ang protocol sa no-live streaming and public exhibition.
