Nagapati sa gihapon ang pamilya ni Christine Dacera nga may natabo nga krimen sa pagkapatay sang flight attendant sa pihak sang resulta sang autopsy sang Philippine National Police Crime Laboratory nga “natural causes” ang kamatayon sang dalaga.
Suno kay Atty. Jose Leda III, abogado sang pamilya Dacera, himuon nila ang tanan agud mahatagan sang hustisya si Christine.
Nahibalua nga Enero 1 sang udto sang nakita si Christine nga wala na nagaginhawa sa bathtub sang isa ka hotel room sa Makati City sa diin sila nag-check in agud magselebrar sang bag-ong tuig kaupod ang iya mga kaabyanan.
Nagapati ang pamilya Dacera nga gin-abuso kag ginpagamit sang droga si Christine, nga ginpanginwala naman sang mga abyan sang dalaga.
Sa bag-o nga medico legal report halin sa Crime Laboratory sang PNP, nasaad nga “ruptured aortic aneurysm” ukon paglupok sang mayor nga ugat nga tuga sang mataas nga blood pressure ang rason sang kamatayon ni Christine.
Ang aortic aneurysm ang ginakonsidera nga medical condition kag ang rape ukon drug overdose ang indi mangin resulta sa pagdevelop sang nasambit nga balatian.
Posible pahayag sa medico legal report nga madugay na nga may yara sang aneurysm si Christine.
