Nagpasalig ang Passi City Government sa mga pumuluyo nga ginaobra nila ang tanan nga mga tikang agud mapadasig ang pagtapna sang pagsaka sang COVID-19 cases sa syudad.
Ini ang kasunod sang pagpaidalom sa enhanced community quarantine (ECQ) sang Passi City nga nag-umpisa sang Enero 28 kag magalawig tubtub sa Pebrero 11.
Sa interview sang Bombo Radyo kay Passi City Mayor Atty. Stephen Palmares, iya ginpahayag nga agud madasig ang pagpauntat sang kaso sang COVID-19 sa ila nga lugar, hugot nga ginapatuman ang mga health protocol.
Suno sa alkalde, padayon ang border control sa syudad sa diin hugot nga ginabantayan ang paggwa kag pagsulod sang mga residente.
Magluwas sa mga frontliners, indi pagpahanugutan ang mga tawo nga maggwa-sulod sa syudad sang Passi.
Sa kada panimalay, isa lamang ang mahimo makaggwa agud nga magbakal sang essential goods kaangay sang pagkaon kag bulong.
Ginpahanumdom man ni Palmares ang pagpatuman sang liquor ban, pagpanaog sang curfew sa las 7:00 sa gab-i kag pagpasira sang pila ka mga establisyemento komersyal.
Sa mga mapadulong naman sa syudad sang Iloilo, pahanugutan lamang nga makaggwa sa syudad sang Passi ang mga may yara sang medical appointment.
Ginpahayag niya nga sa mga pumuluyo nga wala sang pribado nga salakyan, mahimo nga makasakay sa bus ukon ceres.
Ang mga nagapadulong naman sa iban nga kabanwahanan ang mahimo makalabay sa national highway sang Passi City, apang indi pwede makalagaw ukon makapanaog sa lugar.
SA LATEST NGA NUMERO SANG COVID-19 SA PASSI CITY
Nagsaka na sa 226 ang numero sang may active case sang COVID-19 sa Passi City.
Una na nga nagpositibo sa COVID-19 ang isa ka empleyado sang Passi City Hall nga tag-iya sang kiosko sa merkado.
Matapos ang ginpatigayon nga contact tracing, natukiban nga nalatnan man sang COVID-19 ang anom pa ka mga vendors.
Suno kay Palmares, ginkahangawa niya ang pagsaka sang mga kaso sang virus gani gilayon siya nagdesisyon nga ipaidalum ang syudad sang Passi sa ECQ bangod mas pilion niya ang ikaayong lawas sang iya pumuluyo.
Nagpasalamat man siya nga apisar sang sitwasyon, padayon pa nga nagahugpong ang mga pumuluyo sa lugar.
Sa subong suno kay Palmares masobra 10,000 na ka tawo ang napaidalum sa reverse transcription polymerase chain reaction (RT -PCR) test sa Passi city.
Gin-athag man niya nga libre para sa tanan ang pagpatigayon sang swab test lakip na ang sa Molecular Laboratory sa ila nga lugar.
Sa subong, yara na sa quarantine facility ang mga pumuluyo nga nagpositibo sa COVID-19.
Nagpanawagan man ang alkalde sa mga pumuluyo sang Passi City, nga magsakripisyo anay sang gamay apisar nga mabudlay ang sitwasyon bangud tuman ka delikado ang kakugmat nga dala sang virus.
Nahibaluan nga ang syudad sang Passi lamang ang nagaisahanon nga lugar sa Western Visayas nga napaidalum sa ECQ.
