Mas madali nga mag-angkon sang balatian nga Goiter ang mga babayi nga lapit na nga magmenopause.
Sa interview sang Bombo Radyo kay Dr. Elvin Tiangha, iya ginpahayag nga ang Goiter amo ang balatian nga epekto sang pagbanog sang thyroid gland nga nagatubo sa tutunlan.
Bangud sa pagbanog, naga-angkon sang bukol sa liog ang isa ka tawo sa bahin sang ‘adam’s apple’ kag larynx.
Ini ang ginatunaan sang pagkapaos, mabudlay nga pagginhawa kag pagtulon.
Suno kay Dr. Tiangha, ang thyroid gland sang isa ka tawo ang nagaobra sang thyroid hormones nga kinahanglan sang lawas.
Ang pag-angkon sang Goiter ang epekto sang pagkakulang sang Iodine ukon ‘Iodine Deficiency’ sa lawas sang tawo.
Ang padayon nga pagdako sang Goiter ang isa ka patimaan nga may problema sa thyroid gland.
Gin-athag ni Tiangha nga bisan sin-o lamang ang mahimo matubuan sang Goiter ilabi na sa mga babayi nga yara sa 40 ang edad kag lapit na sa menopausal stage.
Agud nga makalikaw sa balatian nga Goiter, nagpanugyan ang doktor sa publiko nga magkaon sang mga pagkaon nga may mataas nga iodine, tyrosine, kag antioxidants kaangay sang isda, utan kag gatas.
