ILOILO CITY – Nagapabilin nga dako nga palamangkutanon sa Iloilo City Department of the Interior and Local Government (DILG) ang pagpatigayon sang online bulang sa syudad sang Iloilo.
Una na nga nahisugtan sang Iloilo City Council nga mahatagan sang isa ka tuig nga prangkisa ang United Association of Cockpit Owners and Operators of the Philippines Incorporated sa kondisyon nga delayed ang broadcast and data stream kag may 3 tubtub 5 lamang ka segundos nga delay sa livestreaming.
Kasunod man ini sang pagpirma ni Iloilo City Mayor Jerry Treñas sang ordinansa nga nagapahanugot sa pagpatigayon sang online bulang.
Sa interview sang Bombo Radyo kay Iloilo City DILG Director Oscar Lim Jr., iya ginpahayag nga wala man sila sang may nakita nga problema sa pag-apruba sang Iloilo City Government kag Iloilo City Council sa nasambit nga prangkisa bangud ang korte lamang ang makadeklara nga iligal ang isa ka ordinansa.
Apang ang pagpatigayon sang bulang suno kay Lim ang nagahatag sang pagsalangisag sa pagsulundan sang Memorandum Circular 2020-140 sang DILG kag Resolution 79, Series of 2020 sang Inter-Agency Task Force.
Santo sa Memorandum Circular 2020-140, nasaad nga responsibilidad sang mga local government unit officials nga i-monitor ang cockfighting operations kag tutukan ang protocol sa no-live streaming and public exhibition.
Samtang sa Resolution 79, Series of 2020 naman sang Inter-Agency Task Force, nasaad nga ginapasugtan ang cockfighting operations sa mga lugar nga yara sa Modified General Community Quarantine apang subject sa istrikto nga health kag safety protocols kag indi pwede ang in-person audience, online ukon remote betting, pati na ang live broadcasting ukon telecasting sang cockfights.
Ginpahayag ni Lim nga kun madayon ang pagpatigayon sang online nga bulang, isa ka dako nga palaligban kun paano mapatigayon sang operator ang delayed broadcasting kadungan sang pagsunod sang opisyal nga mga pagsulundan.
