Wala sang patawaron ang Land Transportation Office (LTO) Region VI sa mga pasaway nga motorista nga wala nagatuman sa private motor vehicle inspection center (PMVIC) system para sa car registration.
Sa interview sang Bombo Radyo kay Atty. Gaudioso Geduspan, assistant regional director sang LTO Region VI, iya ginpahayag nga kada tuig may 12,000 nga nagakapatay bangud sa road crash.
Suno kay Geduspan 1/3 sa nasambit nga numero ang bangud sa mechanical defects.
Sila sa LTO suno sa opisyal ang nagakampanya sang ‘road safety at all times’.
Nahibaluan nga sa idalom sang LTO Memorandum Circular No. 2020-2240, required ang mga motor vehicles nga magpacheck sang ila salakyan sa private vehicle inspection centers antes magparehistro sa ahensya.
Kinahanglan man suno sa natungdan nga wala sang depekto nga makit-an sa engine, hand break, speedometer, clutch, signal light, stop light kag iban pa nga bahin sang salakyan.
Kun madakpan ang tag-iya sang private motor vehicle inspection centers nga may mga katuntuhan nga ginahimo, nagapamahal sang bayad, ukon nagapapasar sa salakyan nga wala man nakalab-ot sa standards, may mga penalidad nga pagaatubangon.
First Offense – P200,000 kag 30 nga adlaw nga suspension
Second Offense – P500,000 kag 60 ka adlaw nga suspension
Third Offense – Cancellation of Authorization
Sa mga drivers nga indi makapasar sa inspection apang padayon man nga nagabyahe, may atubangon man nga mga penalidad.
