Ginbuyagyag ni Patrocenio C. Chiyuto Jr. alyas Don Chiyuto alyas Don Zhang Lee Chiyuto sa iya live video nga ginpaggwa sa iya personal nga facebook account, kun san-o siya magahatag sang payout sa iya mga investors matapos nga magdeklara sang ‘HOLIDAY’.
Matandaan nga Enero 12, 2021 sang nagdeklarar sang holiday si Chiyuto apang nagpasalig nga temporaryo lang ini bangud may yara pa sang kinahanglan nga hitsuhon sa ila nga mga dokumento para sa ila operasyon.
Suno kay Chiyuto, isa ka mayor nga rason kun nga-a wala pa siya sa gihapon nakagwa sa publiko matapos magdeklara sang holiday, amo ang paghitso niya sang kulang nga mga dokumento nga ginarequire sang Securities and Exchange Commission (SEC) agud maka-operate bilang investment adviser sang investment company niya nga Chiyuto Creative Wealth Document Facilitation Services nga kilala man bilang Chiyuto Double Your Money Scheme.
“Kinahanglan ta anay sang papel nga maayos bag-o ta magpaggwa kay mahirap na ang magpaggwa ka, i-entrap ka na nila.. so ga-antos ko gatabok da sa Roxas para lang makuha ang USB kay amo to ang payout sang tawo..Dumdom niyo ginpabay-an ta kamo, wala ta kamo ginapabay-an,” pahayag ni Chiyuto.
Nagpasalig man si Chiyuto sa iya mga investors bangud indi na maglawig sa duwa ka semana kag matapos na niya hitso ang tanan nga mga dokumento agud makahatag sang payout.
“Buligan niyo ko pangamuyo nga ang aton ginacomply nga mga requirement is gamay nalang…siguro indi na kalampas sang 2 weeks, kay syempre nagapila man ta, gapasa man ta sang requirements ta..nothing against to the business as long as meron kang papel,” dugang pa niya.
Gintuad man sang natungdan nga nagapangayo siya sang pasaylo bangud sa madugay nga holiday kag apisar sini, pat-od nga indi ini buot silingon nga magasara na siya sa iya negosyo.
“Nakapoy naman ko, pero syempre, amo ni ang ginhatag nga role (ang magbulig sa tawo) sa akon sang Ginoo mu, muna ngaa ipadayon ko gid..”
Nagpanugyan man si Chiyuto sa iya mga tawo nga maghulat lamang kag magsalig bangud sa tion nga makompleto na ang mga requirements nga iya ginaproseso, gilayon siya nga magpaggwa sang payout.
“Ito sinasagot ko lang kung kailan, saan at anong oras..Makakarating ho sa inyo yun..kailangan lang natin ng papel na maayos na pwede na pag may signal na, go, go na! hindi sa wala tayong budget, sumusobra pa nga eh..magpatawhay kita kag pangamuyuan ta pirmi aton pamilya nga indi sila ma stress..”
Matandaan nga santo sa SEC, wala sang secondary license bilang Lending Company, Broker and Dealer of Securities, Dealer in Government Securities, Investment Adviser of an Investment Company, kagInvestment House and Transfer Agent ang Chiyuto Double Your Money Scheme.
