Ginserbehan sang Cease and Desist Order (CDO) sang Securities and Exchange Commission (SEC) ang Chiyuto Creative Wealth Document Facilitation Services ukon mas kilala nga Chiyuto Double Your Money Investment Scheme nga naka-base sa Roxas City, Capiz.
Gin-updan ang SEC sang National Bureau of Investigation (NBI), Special Weapons and Tactics (SWAT) kag Philippine National Police (PNP) sa pagserbe sang CDO sa balay ni Chiyuto sa Brgy. Adlawan, Roxas City, Capiz.
Ang Cease and Desist Order amo ang dokumento nga ginapadala sa isa ka indibidwal ukon negosyo agud pauntaton ang ila ginapahayag iligal nga aktibidad agud indi na pagpadayunon pa.
Sa exclusive interview sang Bombo Radyo kay Atty. Russell Ildesa, director sang SEC Region VI, iya ginpahayag nga katuyuan sini amo ang pauntaton ang investment scheme sang Chiyuto nga ginapamunuan ni Patrocenio C. Chiyuto Jr. alyas Don Chiyuto alyas Don Zhang Lee Chiyuto nga amo ang nagaserbe nga owner, principal, proprietor kag sole-stockholder-director-president.
Suno kay Ildesa, magluwas kay Chiyuto, ginserbehan man sang CDO sanday:
Judy Pajarillo, nominee ; Felomina Andrada, alternate nominee; kag officers, representatives, salesmen, solicitors, agents, uplines, enablers kag influencers nga ginalakipan nanday Maricris Can Chiyuto, Maria Christina Chiyuto Canobida, Naneth Barruela, Aureliza Ap-ap, Kiaka Avel Cho , kag ang Capiz Buy and Sell Anything, kag Santiago City Online Market.
Diri kag ginamanduan ang mga natungdan nga:
(1) Untaton ang ila aktibidad kaangay sang pagbaligya ukon pagtanyag sang sales securities pinaagi sa investment contracts kag
(2) Pagkakas ukon pag take down sang online posts kag pagtanyag tubtub mahatagan sang permit sang SEC.
Ang nasambit nga CDO ang nag-ugat matapos nakabaton ang EIPD sang email gikan sa Bangko Sentral ng Pilipinas (BSP) kaangot sa iligal nga paggamit sang Chiyuto sa logo sang BSP sa ila mga produkto sang Agusto 13, 2020.
Diri kag nag-request ang BSP sa EIPD nga paimbestigaran ang investment solicitation activities sang Chiyuto.
Nakabaton man ang EIPD sang pila ka mga complaints, reports, tips kag inquiries pinaagi sa email kaangot sa investment-solicitation activities ni Chiyuto.
Sa nasambit nga reklamo, ginapahayag nga gintanyagan sila ni Patrocenio C. Chiyuto Jr. ukon mas kilala bilang Don Chiyuto nga mag-invest sang korporasyon nga nagatanyag sang investment nga nagagarantiya sang 100% nga balik sa sulod sang sang isa ka adlaw, 30 ka adlaw ukon 45 ka adlaw depende sa promo nga ma-avail.
Nagahatag man si Chiyuto sang 5% nga referral commission sa makaganyat sang dugang nga mga investors.
Nagahatag man ini sang brand new car kag motorcycles pinaagi sa raffle.
Tungod sini, nagpatigayon sang imbestigasyon ang EIPD sa business activities ni Chiyuto kag nakatransaksyon sang mga otoridad si Chiyuto Can Maricris ukon si Maria Christina Chiyuto Canobida nga amo ang lider sang Chiyuto Canobida Team.
Nakumpirma sang EIPD sa ila imbestigasyon sa social media posts kag online activities nga si Chiyuto ukon si alyas Mr. Solve ang nagatanyag sang Double-Your-Money “Roulette” game investment nga nagapangayo sang minumum nga P1.00 kag maximum nga P1 million.
Sang Agusto 18 2020 kag Oktubre 23, 2020, nagpagwa sang advisory ang SEC sa publiko nga pauntaton ang pag-invest kay Chiyuto apang padayon sa gihapon ang nagakatabo nga unathorized investment scheme.
Natukiban man nga ang office address ni Chiyuto sa Gloria Diaz Street BF Resort Village, Talon Dos, Las Piñas City nga nasaad sa DTI Certificate of Business Name Registration ang wala niya ginapanag-iyahan santo sa address nga ginhatag ni Maricris Can Chiyuto.
Ginhatagan naman si Chiyuto sang tubtub lima ka adlaw sang SEC agud mag file sang verified motion agud malift ang CDO.
