Pabor ang Punong Barangay sang PHHC Block 17, Mandurriao, Iloilo City nga himuon duha ka distrito ang syudad sang Iloilo.
Sa interview sang Bombo Radyo kay Punong Barangay Sergio Causing, iya ginpahayag nga pinaagi sa pagtunga sa duha ka distrito, mas madamo nga proyekto ang mapatuman.
Magluwas sina, suno sa iya, mas matatapan ang mga kinahanglanon sang kada barangay bangud may yara sang separado nga mga konsehal kag congressman sa kada distrito.
Nahibaluan nga gin-aprubahan na sa third and final reading sa Kamara ang hagna nga nagaduso nga himuon nga duha ka congressional districts ang syudad sang Iloilo.
Ang House Bill 8477 ukon ang “An Act Reapportioning the Lone Legislative District Of the City of Iloilo” ang ginaduso ni Iloilo City Lone District Representative Julienne ‘Jam-jam’ Baronda.
Sa idalom sang House Bill 8477, maga-updanay ang Jaro, La Paz kag Mandurriao bilang isa ka congressional district samtang mangin separado naman nga legislative district ang Iloilo City Proper, Molo, Arevalo kag Lapuz.
