Tatlo ka punto ang luyag sang Committee on Transportation nga mapaathag sang Land Transportation Office Region VI sa pagsinapol nga patigayunon sa Iloilo City Council bwas, Pebrero 5.
Ini ang may kaangtanan sa buot-ipatuman kag kontrobersyal nga private motor vehicle inspection center ukom PMVIC system.
Sa interview sang Bombo Radyo kay Iloilo City Councilor Atty. Rommel Duron, chair sang Committee on Transportation sa konseho, iya ginpahayag nga ipa-plastar nila sa tiglawas sang LTO Region VI ang mga masunod:
- kun masarangan bala sang pagatukuron nga inspection centers ang volume sang mga salakyan sa syudad;
- kun ngaa tuman ka mahal ang sukot sa inspection; kag,
- kun pwede nga ipaiway anay ang implementasyon sang amo nga pagsulundan.
Suno kay Duron, sa iya pagkahibalo, duha pa lang ka motor vehicle inspection centers ang nahatagan sang authorization sa syudad sang Iloilo agud nga makapatigayon sang inspection. Ini amo ang nahamtang sa Barangay Sambag kag Barangay Balabago sa distrito sang Jaro.
Sa masobra 150,000 ka registered vehicles suno kay Duron, makahangawa kun indi masarangan sang mga inspection centers ang pag-inspect sa mga salakyan kag basi madugayan pa sa mga pila ang mga driver.
“DUGANG NGA PALAS-ANON, MABUG-AT SA BULSA”
Tuman man ka mahal ang dapat bayaran suno kay Duron.
Sa idalom sang bag-o nga motor vehicle registration system, indi magnubo sa 60 ka mga parte sang salakyan ang kinahanglan makapasar sa inspection.
Kun indi makapasar, kinahanglan islan ang partikular nga parte sang salakyan, ipatigayon ang re-inspection kun sa diin dapat magbayad sang kantidad nga katunga sang balor sang bayad sa una nga inspection.
Sa subong, yara lang sa 500 ang ginabayaran sa inspection suno kay Duron apang sa bag-o nga sistema, mangin triple na ang bayad.
Dugang ini nga palas-anon kag mabug-at sa bulsa suno kay Duron ilabi na bangud yearly ukon kada tuig ang inspection sa mga salakyan.
“EDUKASYON PARA SA MGA DRIVER”
Ginaduso ni Duron nga sa baylo nga ipatuman ang PMVIC, mas maayo nga magtutok anay ang LTO sa pag-edukar sa mga driver, sa mga pasahero, kag sa mga pedestrians.
Ginpaathag sang konsehal nga ang kalabanan nga aksidente sa dalanon ang dala sang huro-huros nga pag-drive, pag-maneho samtang hubog, over speeding, illegal overtaking, kag iban pa.
Apang gin-athag ni Duron nga antes hingyuon nga ipaiway ang implementasyon, mas maayo nga pamatian anay ang tiglawas sang LTO Region VI.
Sa consultative meeting nga patigayunon bwas, maga-upod man ang transport group agud nga mapamatian man ang ila nga mga sentimiento.
Una diri, nagpahayag na si LTO Region VI Director Eric Tabaldo nga subong na ipatuman ini nga sistema bangud ‘overdue’ na ini bangud sang nagligad pa kuntani nga tuig ini ipatuman.
Suno kay Tabaldo, ‘preventive rather than reactive’ ini nga tikang bangud indi na nila gusto pa nga madamo nga disgrasya ang matabo sa dalanon bangud sa gubaon nga mga parte sang salakyan.
