ILOILO CITY – Nagapanindugan ang acting chief sang operations division sang Land Transportation Office (LTO) Region VI nga si Atty. Allan Sacramento nga wala siya napahibalo may kaangtanan sa consultative meeting sang Iloilo City Council.
Kahapon, Pebrero 5, sang nagpatigayon sang meeting ang Iloilo City Council kun sa diin ‘no show’ ukon wala sang bisan landong nga napakita ang taga-LTO Region VI.
Ang amo nga meeting ang ginpatigayon agud istoryahan kuntani ang tuman ka kontrobersyal nga private motor vehicle inspection center ukon PMVIC system nga amo ang gina-agunto sang publiko partikular na sang transport group.
Sa interview sang Bombo Radyo kay Sacramento, iya ginpahayag nga matuod nga sang Pebrero 4, siya ang gindesignar ni LTO Region VI Director Eric Lenard Tabaldo bilang official representative sa general operations sang regional office; buot silingon, siya ang may katungdanan sa pagbaton sang mga interview kag magtambong sa mga public hearings.
Apang pahayag ni Sacramento, WALA NAPAHIBALO ang iya opisina kag WALA SANG INSTRUCTION halin kay Director Tabaldo nga may ara siya nga dapat tambungan nga meeting sa konseho sang syudad sang Iloilo kahapon nga adlaw.
“I was not informed by RD Tabaldo. There was no instruction [to attend],” pahayag ni Sacramento.
Una na nagpahayag ang chair sang Committee on Transportation sang Iloilo City Council nga si Councilor Atty. Rommel Duron nga nagpasalig si LTO Director I Engineer Arturo Apolinar nga siya ang maga-attend; apang pahayag naman ni Sacramento, wala man sang nahambal si Apolinar sa iya nahanugod sa anuman nga meeting.
Dugang pa ni Sacramento, WALA SANG TEXT UKON TAWAG nga nabaton ang iya opisina halin kay Atty. Duron.
Nagpasalig man si Sacramento nga magatambong siya sa sunod nga meeting KUN MAPAHIBALO LANG SIYA SANG HUSTO.
Kuntani suno sa iya, indi man magdangat nga ideklarar pa sila nga PERSONA NON GRATA nga amo ang una nga paandam sang Iloilo City Council kun indi pa gid sila magpakita sa sunod nga consultative meeting.
“Ngaa malab-ot pa kita sa amo ‘na nga sitwasyon if we can just clear this out?,” sabat ni Sacramento.
Santo sa una nga pahayag ni Duron, ipatawag liwat ang LTO Region [tentavively] sa ikatatlo nga semana sang Pebrero.
“We will attend basta ma-inform lang ako kun ako ang gusto nila nga mag-attend sina. They designated me as the spokesperson but they should inform me kun may ara dapat i-attend or if there is someone who wants to interview me. Alangan naman mapakot-pakot ko kun diin ko makadto for public hearing nga wala ko sang information.”
