ILOILO CITY – Personal nga gindul-ong ni Iloilo City Councilor Rommel Duron ang imbitasyon sa Land Transportation Office (LTO) 6 agud magtambong sa consultative meeting tuhoy sa Motor Vehicle Inspection System (MVIS).
Sa interview sang Bombo Radyo kay Duron nga amo ang Chairman sang Committee on Transportation and Public Utilities sa Iloilo City Council, iya ginpahayag nga gindul-ong niya mismo ang sulat sa opisina ni LTO Region 6 Director Eric Tabaldo.
Apang suno kay Duron, wala sa iya opisina si Tabaldo kag ang iya lang nga tinawo ang nagbaton sang sulat.
Nakadepende na suno kay Duron kun sin-o ang magatambong sa bahin sang LTO sa pagsinapol nga patigayunon sa Myerkules, Pebrero 10.
Matandaan nga nag-ibwal si Duron matapos nga ginpanginwala ni Atty. Allan Sacramento, legal counsel kag chief sang operations division sang LTO Region 6, nga siya ang ginmanduan ni Director Tabaldo sa ginpatawag nga consultative meeting sang Pebrero 5.
Nahibaluan nga ginpanginwala man ni Sacramento nga nakabaton siya sang text message ukon tawag tuhoy sa nasambit nga pagsinapol sa diin naglab-ot pa sa punto nga ginapadeklarar siya ni Duron nga persona non grata sa Iloilo City.
