Wala na sang tyansa nga padayunon pa sang kontrobersyal nga si Patrocenio C. Chiyuto Jr. alyas Don Chiyuto alyas Don Zhang Lee Chiyuto ang Chiyuto Creative Wealth Document Facilitation Services (CCWDFS) ukon Double Your Money Investment Scheme.
Matandaan nga ginserbehan sang Cease and Desist Order (CDO) sang Securities and Exchange Commission (SEC) ang nasambit nga investment scheme nga naka-base sa Roxas City, Capiz agud pauntaton ang ila ginapahayag iligal nga aktibidad.
Sa exclusive interview sang Bombo Radyo kay Atty. Russell Ildesa, director sang SEC Region VI, iya ginpahayag nga Pebrero 10, amo ang deadline nga ginhatag sa amo nga kumpaniya agud magpasa sang verified motion agud malift ang CDO.
Apang wala nakapasa kag wala man nakasabat ang amo nga investment scheme sa show cause order nga ginserbe sang SEC.
Suno kay Ildesa, wala naman sang tyansa nga mapasar pa ni Don Chiyuto ang secondary license sa SEC.
Bangud sini, suno kay Atty. Ildesa, mangin permanente na ang CDO kag pat-od nga wala na sang gahom ang CCWDFS agud makapadayon pa sa ila nga negosyo kag magsolicit sang kwarta sa publiko.
SA PASALIG NI DON CHIYUTO SA PAYOUT SA PEBRERO 14
Hugot nga nagpanugyan si Ildesa sa investors ni Chiyuto nga indi na magsalig nga magahatag ini sang payout sa Pebrero 14.
Gin-athag sang natungdan nga nasaad sa CDO nga indi na mahimo matandog pa sang Chiyuto ang ila tanan nga assets.
Indi man suno sa iya makatandog sang bank accounts ang CCWDFS.
ANO ANG MATABO SA KWARTA SANG MGA INVESTORS NGA WALA NAKAPAYOUT
May paglaom pa suno kay Ildesa nga makuha sang investors ang ila kwarta nga gin-invest sa Chiyuto Double Your Money Investment Scheme.
Ginpahayag niya nga ang korte gid lamang ang mahimo nga makabalik sang kwarta sa mga nabiktima ni Chiyuto.
Naghatag man sang abiso ang natungdan sa investors nga pasakaan sang kaso si Chiyuto ukon magfile sang affidavit sa National Bureau of Investigation (NBI) kag prosecutor’s office.
Bukas man suno kay Ildesa ang ila talatapan sa magapalab-ot sang reklamo batok sa Chiyuto.
