Ginadumdom ang ika-35 ka tuig nga anibersaryo sang kamatayon sang anay gobernador sang Antique nga si Evelio Javier.
Sa exclusive interview sang Bombo Radyo kay Antique Governor Rhodora Cadiao, iya ginpahayag nga magaselebrar sang Holiday ang bug-os nga Rehiyon VI, Pebrero 10, sa pagdumdom sang pagtinguha ni Javier sa pagpauswag sang probinsya paagi sa pagpahugpong sa mga Antiqueño.
Suno kay Cadiao, apisar layo sa patag ang ila selebrasyon subong nga tuig bangud sa pagpanghangkat nga dala sang COVID-19 pandemic, bukas sa gihapon ang pumuluyo sang Antique sa paghalad sang bulak sa statwa ni Javier nga nahamtang sa plaza sang San Jose.
Ginpahayag niya nga nagpanguna si Evelio Javier sa mga Antiqueno sa pagbangon sa kapigaduhon kag pagsikway sa korapsyon sa diin talamdon ini nga lider nga naghatag man sang paglaom sa masanag nga palaabuton.
Nagakadapat suno kay Cadiao nga magapabilin bilang ehemplo si Javier sa mga pulitiko kag kabataan sa subong henerasyon.
Matandaan nga sang 1984, nagpadalagan si Javier sa Batasan Pambansa bilang tiglawas sang iya probinsiya apang siya ang napierde sa iya political opponent nga si Arturo Pacificador.
Nagprotesta naman siya sa nangin resulta sang eleksyon.
Sa pihak sang mga pagpamahog sa iya kabuhi, si Javier ang nagpangalagad bilang provincial chairman sang Unido Laban party sang tion sang 1986 snap presidential elections, kag nagkampanya para kay the late president Corazon Aquino.
Sa kainitan sang pag-isipay sang boto, ginkontra niya ang mga lideres sang Marcos political party, ang Kilusang Bagong Lipunan (KBL).
Pagkasunod nga adlaw, si Javier ang ginluthang-patay sang nakatalukbong ang ulo nga mga lalaki, sa indi magnubo sa 100 metros nga distansya gikan sa provincial capitol sa diin ang election returns ang gina-canvass kag gina-tally.
Sang narekober ang iya lawas, ginpahayag nga may ginauyatan pa ini nga rosarito sa iya kamot, kag ang adlaw sang iya kamatayon amo man ang kapiestahan sang Our Lady of Lourdes.
Ginpahayag ni Cadiao nga ang nangin kabuhi ni Javier amo ang testimoniya sang simple kag tampad nga serbisyo publiko sang isa ka Antiqueño.
