ILOILO CITY – Ginmanduan ni Philippine National Police Chief Police General Debold Sinas ang mga pulis sa Western Visayas nga mas pasangkaron pa ang kampanya kontra sa rebelde nga grupo kag sa ila nga mga kalakasan.
Ini ang kabahin sang iya ‘Talk to Men’ kadungan sang iya Pebrero 8 nga pagbisita sa talatapan sang Police Regional Office VI.
Sa interview sang Bombo Radyo kay Pol. Lt. Col. Joem Malong, spokesperson sang PRO VI, iya ginpahayag nga ginpasigurado man ni Sinas nga mas mapabaskog pa ang away kontra sa iligal nga mga aktibidad sa rehiyon kaangay sang iligal nga droga kag illegal gambling.
Dapat man siguraduhon nga wala sang pulis nga may iregularidad.
Suno kay Malong, ginpahayag ni Sinas nga wala dapat ginatolerar ang iligal nga mga aktibidad sang mga pulis — sa training man ukon sa aktwal na nga serbisyo sa hanay sang PNP.
Sa Western Visayas, masobra 50% na sang mga police personnel ang napaidalom sa illegal drug use test.
Duha sa sini nga mga pulis nga lunsay taga-Negros Occidental ang nagpositibo sa test bangud sang paggamit sang shabu.
Sa subong, padayon pa ang summary dismissal proceedings.
Sa bahin naman sang welfare sang mga pulis, ginpasigurado sang PNP Chief nga madugangan ang mga station health units.
Kada isa ka personnel ang may yara man sang medical record.
May ara man nga order sa finance division nga mas padasigon ang reimbursement process sa hospitalization expenses sang mga pulis nga napilasan sa tion sang ila operasyon.
Agud indi na mahul-an ang pamilya sang mga police personnel, may gin-introduce man nga burial package para sa mga pulis nga mapatay sa tion sang operasyon.
Nalipay man ang mga police personnel bangud magluwas sa mga mandu gin-introduce kag mga bag-o nga programa, may cash incentives man nga ginhatag si Sinas para sa mga pulis nga may birthday nga natuon sa Pebrero.
Ginhatagan man sang cash incentives ang mga performing city and provincial police stations.
