Dako ang rolyo sang pagpatuman sang Consumer Act of the Philippines ilabi na subong nga pandemya.
Sa interview sang Bombo Radyo kay Atty. Rodel Taton, Dean sang San Sebastian College Recoletos Graduate School of Law kag presidente sang Consumers Union of the Philippines, iya ginpahayag nga sa idalom sang Consumer Act of the Philippines, katungdanan sang estado nga protektahan ang interest sang consumer, patin-aron ang general welfare kag magbalay sang pagsulundan sa pagnegosyo.
Sa idalom sang layi, ang estado ang nagakadapat nga magpatuman sang tikang agud mapalab-ot ang mga masunod:
a) proteksyon batok sa halit sa ikaayong lawas kag safety ;
b) proteksyon batok sa indi patas nga pagbaligya;
c) probisyon sang impormasyon kag edukasyon para sa pagpatuman sang kinamatarong sang mga consumer;
d) probisyon sang kinamatarong pinaagi sa pagremedyo kag
e) pag-upod sang consumer representatives sa pagbalay sang social kag economic policies.
Sa idalom sang Article 6 sang layi, ang mga provision sang Articles kag ang implementing rules and regulations ang nagakadapat nga ipatuman sang:
a) Department of Health sa aspeto sang pagkaon, bulong, devices kag substances;
b) Department of Agriculture sa aspeto sang agrikultura kag
c) Department of Trade and Industry sa aspeto sang consumer products.
