ILOILO – Magapangatubang sang kaso nga murder ang suspek nga ginatudlo utok sa strafing incident nga ginkamatay sang menor de edad sa Sitio-Catmon Barangay Calansanan I, Badiangan, Iloilo.
Ang biktima amo si Mary Jane Yocogco Jano, Alyas Poypoy, 11, residente sang nasambit nga lugar kag ikaduha sa lima ka mag-utod.
Samtang ang suspek naman amo si April John Valle, 33, residente man sang nasambit nga lugar.
Una na ginpahayag nga ginpaarakan-luthang sang suspek ang puluy-an sang biktima kag nag-angkon ini sang igo sa ulo nga amo ang gintunaan sang iya kamatayon.
Sa interview sang Bombo Radyo kay PLt. Ma. Doren Losaria, hepe sang Badiangan Municipal Police Station, iya ginpahayag nga daan nga hiligut-anon sa pinamilya ang gin-ugatan sang insidente.
Suno kay Losaria, may yara na sang duha ka witness nga makapamatuod nga si Valle ang responsable sa krimen.
Indi naman magnubo sa walo ka lupok suno sa iya ang nabatian sang mga tawo sa palibot sa diin sa una nga lupok naigo na sa ulo si alyas Poypoy.
Narekober naman sa crime scene ang bala nga ginapahayag may yara sang hilo.
