Nadugangan sang 16 ka mga empleyado sang Universal Robina Corporation ang nagpositibo sa COVID-19 sa San Enrique, Iloilo.
Sa interview sang Bombo Radyo kay Mayor Trixie Fernandez, iya ginpahayag nga sa 634 ka mga empleyado, magluwas sa mga nagpositibo, may yara sang tatlo ka mga invalid results apang liwat sila nga ipaidalom sa swab test para sa COVID-19.
Sa 16 ka mga COVID-19 positive, apat diri ang gin-tag sa Passi City kag 12 naman ang mga taga San Enrique.
Ang mga nagpositibo ang gindala naman sa quarantine facility samtang naka home quarantine naman ang ila mga pamilya.
Samtang sa 12 ka mga taga San Enrique nga nagpositibo sa virus, pito sa ila ang residente sang Barangay Imbang Pequeño sa nasambit nga banwa.
Gani apisar nga i-lift na subong Pebrero 16 ang Enhanced Community Quarantine (ECQ) sa nasambit nga barangay, i-extend naman ang isa ka zona ukon porsyon sa diin lunsay naga-istar ang pito ka mga empleyado nga nagpositibo sa COVID-19.
Magalawig ang ECQ sa amo nga zona tubtob Pebrero 22.
Ang punong barangay naman sang Imbang Pequeño kag ang iya misis ang padayon nga nagapabilin sa ospital matapos nagpositibo sa virus sa diin sila ang lunsay naga-recover na.
