ILOILO CITY- Wala sang ginapili nga sitwasyon ukon panahon ang pagka- Kristiyano.
Sa interview sang Bombo Radyo kay Felina Palabrica, myembro sang Prayer and Devotion sang Parish of the Immaculate Conception sa Tanza, Iloilo City Proper, may kaangtanan sa pag-obserbar sang Ash Wednesday, iya ginpahayag nga apisar may pandemya, nagatinguha sa gihapon ang mga tawo kag sumilimba nga mapakita ang ila responsibilidad bilang tumuluo.
Suno kay Palabrica, nagbag-o man ang pamaagi sang pagbutang sang abo tuga sang pandemya bangud sa baylo nga ginapahid sa agtang, ginaburibod na lang ini sa ulo agud malikawan ang body contact, nahangpan ini sang Diyos bangud wala ini nagabag-o sang pagtuo.
Pahayag niya, ang importante amo nga mahatagan sang pagpasidungog ang isa sa pinaka-importante nga balaan nga adlaw sa liturhikal nga kalendaryo nga amo ang nagabukas sang kwaresma nga panahon sang pagpuasa kag pagpangamuyo nga nagapreparar sa mga tawo sa pagkabanhaw ni Hesukristo.
