ILOILO – Hugot nga ginpanginwala sang suspek nga ginapahayag myembro sang isa ka grupo nga isa siya sa nagpatay sa lalaki nga nasapwan sa kilid sang karsada sa Barangay Daan Banua, Estancia, Iloilo.
Ang biktima amo si alyas Nonoy, ginabanta 14 tubtob 16 anyos ang edad.
Samtang ang suspek naman amo si Alberto Barrio, 30 anyos, kag residente sang Pontevedra, Capiz.
Sa exclusive interview sang Bombo Radyo kay Barrio, iya ginpahayag nga naulamid lamang siya sa krimen.
Ginpahayag naman niya nga nakalab-ot siya sa banwa sang Estancia bangud sa iya trabaho.
Suno sa iya, nagkilalahay lamang sila ni Nonoy sang ginlibre niya ini sang kape sang kaagahon sang Pebrero 14, bag-o matabo ang crime incident.
Sang nagsakay na sila ni Nonoy sa motorsiklo padulong sa Barangay Daan Banua, nakibot nalang sila sang may nag-angkas nga duha ka dako nga lalaki sa diin lunsay may tabon ang itsura.
Santo sa panaysayon niya, kilala niya ang duha ka tawo sa diin ginpangalanan niya ini nga alyas ‘batang tun-og’ kag ‘kalbo dodoy’.
Nagkalain-lain naman ang pahayag niya sang ginpamangkot ini natuhoy sa matuod nga natabo sa krimen.
Una niya nga ginpahayag nga nangamot siya sa biktima apang indi siya ang nagpatay.
Masunod niya nga gintuad nga ginpulihan sila kastigo ni nonoy sang duha ka tawo apang sa ulihi, nakapalagyo siya.
