ILOILO – ‘Gintorture sang mga suspek’ ang isa sa ginalantaw sang Estancia Municipal Police Station matapos nakitaan sang pilas sa kinatawo ang menor de edad nga ginhal-id patay sa higad sang karsada sa Barangay Daan Banua, Estancia, Iloilo sang Pebrero 14.
Ang biktima amo si alyas Nonoy, kag ginabanta 14 tubtob 16 anyos ang edad.
Samtang, dakop naman sa hot pursuit operation sang damlag lang ang suspek nga si Alberto Barrio, 30 anyos, kag residente sang Pontevedra, Capiz.
Una na ginpahayag nga may yara na sang witness nga amo ang makapamatuod nga si Barrio ang nakit-an nga ulihi nga nakaupod sang biktima.
Sa interview sang Bombo Radyo kay PMaj. Aldren Lamera, hepe sang Estancia Municipal Police Station, iya ginpahayag nga magluwas sa sisi sa ibabaw sang kilay kag dalagko nga lagob sa nawong nga naangkon sang biktima, dako man nga palaligban ang nakit-an nga pilas ukon hiwa sa iya kinatawo.
Suno kay Lamera, posible nga gintorture pa ang biktima bangud sa pilas sa iya kinatawo nga daw kaangay nga gincircumcise ini.
Sa tion nga matul-id suno sa natungdan ang identity sang biktima, mas maayo nga makahatag sang clearance ang pamilya sini agud mapatigayon ang autopsy sa iya lawas kag matumod ang gintunaan sang iya kamatayon.
Pahayag ni Lamera, sa ila pagpanalawsaw sa witness, si Barrio ang may yara sang grupo sa diin ginapahayag ginpasibangdan nila si alyas Nonoy kag ginplanuhan nga patyon.
Sa subong, nagapadayon pa ang pagpangita sa duha pa ka mga suspek samtang may ginautayan naman nga testigo ang otoridad.
Dugang pa sang natungdan, sa tion nga mapamatud-an ang motibo sa likod sang krimen, magapangatubang ang mga suspek sang kaso nga Murder kag Republic Act 7610 ukon “Special Protection of Children Against Abuse, Exploitation and Discrimination Act.”
Samtang, ginpahayag naman sang pila ka mga residente sang Barangay Daan Banua, Estancia, Iloilo nga kaangay nga gin-trippingan ang biktima bangud nasapawan ini nga nagahayaon kag wala na sang kabuhi samtang nagakapot sa iya kinatawo.
Sa interview sang Bombo Radyo kay alyas Margie, residente sang nasambit nga lugar, iya ginpahayag nga indi na makilal-an ang itsura sang biktima bangud puno ini ka lagob.
May yara pa sang panapton ang biktima apang ang dilargo sini nga ginasuksok ang nakapaidalom gamay sa diin makit-an ang kinatawo sini.
Dugang pa niya nga nakabati sang hibi sang bata ang iya lola sang gab-i apang wala naman ginhatagan sang atensyon sa pagdumdom nga may naglabay lamang.
