ILOILO – Wala pa sa gihapon mapat-od sang Central Office sang Land Transportation Office (LTO) kun ipaidalom sa rehabilitation ang Motor Vehicle Inspection Center (MVIC) nga nahamtang sa San Miguel, Iloilo.
Sa interview sang Bombo Radyo kay Atty. Allan Sacramento, legal counsel kag chief sang operations division sang LTO Region VI, iya ginpahayag nga tuig 2010 pa natukod ang MVIC sa amo nga lugar apang wala nadayon ang operasyon bangud sa kakulang sang installation equipment.
Suno kay Sacramento, ginabanta isa ka ektarya ang kalapadon sang center.
Ginpahayag niya nga kun madesisyunan sang LTO nga mapaidalom sa rehabilitation ang amo nga MVIC, ginabanta indi magnubo sa P35 million ang ipain nga budget para diri.
Apang gintuad ni Sacramento nga kun indi na ini maparehab, mahimo nga gamiton na lamang ini bilang extension office sang LTO.
Sa subong suno sa natungdan, ginagamit nalang ang amo nga inspection center bilang impounding area sa diin gintambakan sang mga daan kag guba nga mga transportation vehicles.
Nahibaluan nga ang MVIC amo ang pasilidad nga nagaobra sang computerized kag automated nga inspeksyon sang mga salakyan kasunod sang Motor Vehicle Inspection System (MVIS) nga amo ang sistema nga nagatumod kun ang isa ka salakyan “roadworthy” ukon indi.
Ginahibalo sa MVIC kun ang isa ka salakyan safe gamiton sa dalanon kag nagasunod sa emission standards pinaagi sa maid-id nga pag-inspeksyon sang 68 ka mga component sang salakyan kaangay sang engine, hand brake, speedometer, clutch, signal light, stop light kag iban pa.
