ILOILO CITY – Nabudlayan ang Mandurriao Police Station nga madakpan ang motorcycle-riding suspects nga amo ang nagluthang-patay sa pakaisa ni Melvin Odicta Sr., isa sa identified drug lords sa Western Visayas, sa Barangay Tabucan, Mandurriao.
Ang biktima amo si Agustine ‘Nonoy’ Odicta, 52, residente sang Barangay Malipayon, Iloilo City Proper, panday, kag nagabantay sa prutasan sa Barangay Tabucan.
Una na ginpahayag nga drug surrenderer ang biktima kag graduating na kuntani sa drug rehabilitation program.
Sa interview sang Bombo Radyo kay Police Major Jonathan Pinuela, hepe sang Mandurriao Police Station, iya ginpahayag nga wala pa gihapon naistorya sang imbestigador ang asawa sang biktima bangud nagahinibi lang ini kun makakita sang pulis.
Nagpamalibad man ang pamilya nga ipaidalom sa autopsy examination ang bangkay ni Odicta.
Suno pa kay Pinuela, wala pa sang testigo nga nagatindog nga amo ang makatudlo ukon makalaragway sa riding-in-tandem suspects.
Ang narecover nga mga bala sa crime scene ang napasa naman sa crime laboratory para sa ballistic examination.
Nagapadayon pa subong ang imbestigasyon sang mga pulis may kaangtanan sa insidente.
