Nagapati ang Jaro Police Station nga may yara sang ideya ang lalaki sa mga suspek nga nagtuyo nga luthangon siya sa Barangay Tacas, Jaro, Iloilo City.

(Nakalikaw si Rodolfo Melicado sang siya ang tuyo nga tiruhon sang mga suspek. Sa baylo nga siya maigo, naglusot sa trapal ang bala)

Ang biktima amo si Rodolfo Melicado, 36 , tumandok sang Maasin, Iloilo apang nagabantay sa baligyaan sang kahoy sa Tacas.

Sa interview sang Bombo Radyo kay Pol Lt. Col. Reuben Siason, hepe sang Jaro Police Station, iya ginpahayag nga hingyuon nila si Melicado nga magpadulong sa police station agud nga makuhaan sang testimoniya.

Suno kay Siason, may yara sang posibilidad nga pagtimalos ang rason sang pagtuyo nga pagpatay sa biktima.

Ini bangud magluwas sa 2013 nga shooting incident nga ginakaulamiran ni Melicado sa diin na-settle na ang ini nga kaso, involve pa gid ini sa Disyembre 2020 sa pagpangluthang.

Samtang suno naman kay PMaj. Fernand Limbungan, hepe sang Maasin Municipal Police Station, matapos ang insidente sang Disyembre 2020, gilayon nga nadula si Melicado ukon nagpalagyo.

Sa subong yara na sa bahin sang Prosecutor’s Office ang kaso nga ginfile batuk kay Melicado.