Nagakadapat nga tagaan sang pagtamod sang isa ka iloy ang iya ikaayong lawas pagkatapos magbata agud malikawan nga mabughat.
Sa interview sang Bombo Radyo kay Dr. Salvy Villareal Espina, Obstetrician kag Gynecologist, iya ginpahayag nga ang postpartum period amo ang anom ka semana pagkatapos sang pagbata sang isa ka iloy.
Suno kay Espina, stressful ini nga period kag mahimo mahulog sa postpartum depression kun indi paghatagan sang nagakaigo nga pagtamod.
Magluwas sa pagbag-o sang mga emosyon, kinahangalan nga mangin handa man ang isa ka iloy sa mga pagbag-o sa iya lawas.
Ini ang ginalakipan sang pagbanog sang dughan, pagpamalhas, constipitation, pagdugo sang kinatawo kag iban pa.
Apang ginpahayag sang doktor nga indi dapat madulaan sang paglaom ang mga iloy nga naga-agi sa postpartum period.
Yari ang pila ka mga tips nga makabulig agud mahagan-hagan ang epekto sang postpartum period:
- Pag-angkon sang nagakaigo nga pahuway kag pagtulog
- Pagpangayo sang bulig sa pamilya ukon abyan kag
- Pagkaon sang masustansya kaangay sang utan, prutas kag protein
Nagpanugyan man ang doktor sa mga iloy nga bag-o lamang nga nagbun-ag, nga nagakadapat nga regular nga magpacheck-up sa doktor.
