ILOILO CITY – Magadonar ang Iloilo City Government sang 25 ka motorcycyle big bikes sa Iloilo City Police Office (ICPO).
Ini ang kasunod sang pagpungko ni Police Colonel Uldarico Garbanzos bilang bag-o nga director sang ICPO.
Una na nga nagpasalig ang bag-o nga director nga tutukan sang iya administrasyon ang paglagas sa mga motorcycle-riding suspects sa Iloilo City nga wala lang nagapangluthang-patay kundi nagahimo sang nanuhay-tuhay nga krimen.
Sa interview sang Bombo Radyo kay Garbanzos, iya ginpahayag nga nagapasalamat sila sa gobyerno bangud mangin dako nga bulig sang 25 ka mga motorsiklo sa pagpasangkad sang motorcycle police operation ilabi na ang quad stop operation.
Ang quad stop sang isa ka police unit ang ginabug-usan sang intelligence, operations, police-community relations, kag investigation.
Agud malikawan ang dugang nga mga kaso sang motorcycle riding-in-tandem incidents, patigayunon ang intelligence operation, operational alignment, intelligence-driven placement sang checkpoints, Oplan Sita, Oplan Bakal, kag iban pa.
Suno kay Garbanzos, magapatigayon sila sang training sa mga pulis sa pagmobilize sang dugang nga big bikes.
Nahibaluan nga si Garbanzos ang nagpungko bulos kay Police Colonel Eric Dampal nga nangin director sang ICPO chief humalin sang Pebrero 20, 2020.
