ILOILO – Wala ginpaboran sang gobernador sang probinsya sang Iloilo ang ‘No Vaccine, No Work’ policy.
Sa interview sang Bombo Radyo kay Iloilo Governor Arthur Defensor Jr., iya ginpahayag nga ginakabig nga economic frontliners ang tanan nga empleyado sa syudad man ukon probinsya sang Iloilo kag sakop ang mga ini sa priority list sang gobyerno nga makabaton sang COVID-19 vaccine.
Suno kay Defensor, dako nga pagpanghangkat nga tutukan sang gobyerno ang pag-edukar sa mga pumuluyo sa kaepektibo kag importansya sa ikaayong lawas sang nasambit nga bakuna.
Gin-athag ni Defensor nga kun bakuna ang paga-istoryahan, nagakadapat nga wala sang pilitay diri.
Dugang pa sang natungdan, mas maayo nga sugilanonan ang ‘No Vaccine, No Work’ policy sa tion nga may yara na sang bakuna sa COVID-19 ang Iloilo.
Gin-abiabi man sang gobernador ang nangin sentimento sang Iloilo City Government nga sakupon ang tanan nga empleyado nga nagatrabaho sa syudad lakip na ang mga empleyado nga taga- probinsya sa tion nga mag-umpisa na ang COVID-19 vaccination.
