ILOILO CITY – Ginlaslasan sang Chairman sang Committee on Transportation sa Iloilo City Council ang Land Transportation Office (LTO) kag Department of Transportation (DOTr).
Ini matapos ginhimo nga impounding area sang daan kag guba nga mga salakyan ang Motor Vehicle Inspection Center (MVIC) nga nahamtang sa San Miguel, Iloilo.
Sa una nga pagpakig-angot sang Bombo Radyo sa LTO, ginpahayag ni anay Regional Director Gerard Camiña, nga sa subong, masobra na sa 20 ang extension offices sang LTO sa Western Visayas kag kun kinahanglan ang kada MVIC sa kada extension office, daku man nga kwarta ang kinahanglanon.
Ini posible suno sa iya ang rason kun ngaa gintugyan na ini sa private investors nga amo subong ang mainit kag kontrobersyal nga Private Motor Vehicle Inspection Center System.
Sa interview sang Bombo Radyo kay Councilor Atty. Rommel Duron, iya ginpahayag nga mas maayo nga ‘magresign’ nalang ang mga taga LTO kag DOTr kun indi nila masarangan ang ila obra.
Suno kay Duron, ginhaboy lang sang mga talatapan ang minilyon nga gingasto sa nasambit nga MVIC.
Mahimo nga kulang suno sa iya sa feasibility study ang MVIC rason nga wala ini magamit sang maayo.
Mas maayo kuntani suno sa natungdan kun wala napabay-an ang MVIC agud nga makakinot ang mga motorista.
Ini bangud nagabalor lamang sa P100-P300 ang inspection sa mga MVIC sang gobyerno.
Apang indi naman magnubo sa P600 ang iya ka Private Motor Vehicle Inspection Center system.
Ginpahayag ni Duron nga sa idalom sang Republic Act 4136 ukon Land Transportation and Traffic Code, ini nga responsibilidad ang dapat nga abagahon sang LTO kag indi pag-itugyan sa pribado nga sektor.
