ILOILO – Ginaduso sang alkalde sang Igbaras, Iloilo ang pagpatuman sang ‘No Vaccine, No Transaction’ policy.
Sa exlusive interview sang Bombo Radyo kay Mayor Dr. Jaime Esmeralda, iya ginpahayag nga kuntani magapaggwa ang Department of Health (DOH) kag Iloilo Provincial Government sang card sa diin nakabutang nga indi makahimo makapatigayon sang transaction sa pribado ukon pampubliko nga establisyemento kun indi makapabakuna sang duha ka doses sang COVID-19 vaccine.
Suno kay Esmeralda, kulang sa ihibalo ang mga pumuluyo natuhoy sa importansya sang COVID-19 vaccines.
Ini ang isa sa ginatudlo nga rason sang alkalde kun ngaa madamo ang mga wala nagapasugot nga mabakunahan.
Ginhalimbawa man sang natungdan ang natabo sa ila general assembly sa duha ka mga barangay sa ila banwa sa diin tuman ka nubo ang numero sang mga nagapasugot nga mabakunahan.
Gintuad man sang alkalde nga nahadlok ang mga pumuluyo ilabi na ang mga senior citizens sa side effects sa COVID-19 vaccine sa diin may mga report nga may nagakapatay matapos mabakunahan.
”Tani it’s about time na guro nga ang Department of Health (DOH) sang Provincial Government nga magdecide sang program.. ang idea ko gani tani, sa kada banwa ma-issue sang card nga may complete ka nga duha ka doses sang vaccine..and then ang card ngana mangin passport card to transact business sa mga bangko, munispyo..nga kun wala ka sang card, indi ka macater..we are protecting other people nga malatnan kun indi ka magpabakunaโฆ”
