ILOILO CITY- Patay ang driver sang isa ka elf truck kag pilason naman ang driver sang isa ka de- pampasahero nga bus sa natabo nga bungguanay sang duha ka salakyan sa Cabilauan, Barotac Nuevo, Iloilo.
Ang napatay amo si Johnny Delariarte, 46, residente sang Poblacion, Sara, Iloilo kag konsehal sa amo nga barangay.
Ang driver sang bus ang ginkilala nga si Roel Caguindangan, residente sang Concepcion, Iloilo nga nakaangkon man sang pilas apang conscious ini sang marescue.
Wasak ang ulo sang elf truck sa diin nagbaliskad ang lawas sang driver nga nagatapik sa bumper kag wala sang pangalibutan kag duguon.
Natigayon naman nga marescue ang driver sang bus nga naipit man sa nagupi nga porsyon sang ulohan sang bus samtang wala man sang pasahero nga nakaangkon sang malala nga pilas.
Naglinapta sa dalan ang karga nga mga ulutanon kag karne sang elf truck nga ginamaneho sang biktima nga isa ka negosyante.
Naghalin sa Concepcion, Iloilo ang nasambit nga bus nga may karga nga 15 ka pasahero samtang halin naman sa Iloilo City padulong sa Sara, Iloilo ang elf truck apang bangod sa impact sang bungguanay, nagtiyog ang elf truck sa direksyon pabalik sa syudad.
Nahibaluan nga ang napatay ang manghod ni Punong Barangay Woody Delariarte sang Kauswagan , Iloilo City Proper.
Sa interview sang Bombo Radyo sa punong barangay, iya ginpahayag nga halin sa Iloilo Terminal Market ukon Super ang iya manghod agud mangompra kag pabalik na kuntani sa Sara, Iloilo sang natabo ang aksidente.
