ILOILO CITY – Dugang lang nga information campaign ukon pag-edukar ang kinahanglan agud nga suportahan sang kadam-an sa business sector ang mass vaccination batok sa COVID-19.
Sa interview sang Bombo Radyo kay Angel De Leon, presidente sang Iloilo Economic Development Foundation Incorporated ukon ILED, iya ginpahayag nga apisar bilog nga kalibutan na ang naapektuhan sang virus, may iban sa gihapon nga kulang ang ihibalo kag sala ang implikasyon sa bakuna.
Wala pa sang posisyon ukon pinal nga hinambalan ang ILED suno kay De Leon kun himuon nga ipatuman ang ‘No Vaccine, No Work’ policy sa ila nga nasakupan nga mga empleyado, apang ang sigurado subong amo nga importante nga mahangpan sang mga empleyado kun daw ano kaimportante ang bakuna sa ila nga trabaho.
Suno kay De Leon, plano man nila nga librehon ang bakuna para sa ila tanan nga empleyado agud malab-ot ang herd immunity.
“All of us know nga there is AstraZeneca, may Pfizer, may Sinovac… but whether we know what this vaccine is all about, I think, is another issue. As long as there is educational drive, I think there is a very little reason why they should not be vaccinated,” pahayag ni De Leon.
Nagapati man ang natungdan nga daku ang mabulig sang vaccine rollout sa pagbangon sang mga negosyo apang wala ini nagakahulugan nga kalimtan na ang minimum health protocols.
Kangay sang pahayag sang DOH, nagapati man si De Leon nga kinahanglan sa gihapon ang pagsuksok sang face mask kag pagtuman sa physical distancing ilabi na sa mga negosyo nga may face-to-face transactions.
