ILOILO CITY – Nagpasa na sang resolution ang Iloilo City Council sa Department of Public Works and Highways (DPWH) agud masabat ang problema sa Budburan Creek nga amo ang ginatudlo rason sang pagbaha sa mga lugar sa Lapuz, Iloilo City.
Matandaan nga nagwangal ang pila ka mga pumuluyo bangud sa dako nga huol nga gintuga sang pagbaha kun magbubo ang ulan sa Sinikway kag Don Esteban, Lapuz, Iloilo City.
Sa interview sang Bombo Radyo kay Iloilo City Councilor Ely Estante, Chairman sang Engineering, Construction, kag Public Works, sa konseho, iya ginpahayag nga may ginhingyo na sila nga P95 million pesos nga pondo sa DPWH para sa phase 1 kag 2 nga renovation sang Budburan Creek.
Suno kay Estante, ila ginalantaw nga kun mahimo nga marehabilitate ang nasambit nga mga creek, butangan ang mga ini sang doble nga tamburong padulong sa dagat agud nga mangin tayuyon ang ilig sang tubig kag indi na magsupon ang mga basura.
Sa subong suno sa natungdan, ginahulat nalang nila ang mangin sabat sang DPWH agud gilayon na nga masolusyunan ang problema.
